Բացառիկ ասեղնագործ նմուշներ․ Երևանի պատմության թանգարանը բացահայտում է «Կնոջ զգեստապահարանի գաղտնիքները»
Կանանց միամսյակին ընդառաջ՝ մարտի վեցին, Երևանի պատմության թանգարանը ներկայացրեց «Կնոջ զգեստապահարանի գաղտնիքը» բացառիկ ցուցահանդեսը, որը բացահայտում էր 19-ից 20-րդ դարերի հայ կնոջ հանդերձանքը՝ ներքնազգեստի եզակի ասեղնագործ նմուշներ, հազվագյուտ գոտիներ և աքսեսուարներ, արդուզարդի պարագաներ և այլն։
Հավաքածուում ուրույն տեղ էին զբաղեցնում Երևանի, Արևմտյան Հայաստանի մի շարք շրջանների՝ Այնթափի, Վանի, Կարինի, Ուրֆայի կանանց ասեղնագործ ներքնազգեստներն ու գիշերազգեստները։
Երևանի պատմության թանգարանի՝ Հասարակայնության հետ կապերի բաժնի ղեկավար Մարինա Խաչմանուկյանը նշեց, որ ցուցահանդեսում ներկայացված նմուշներից շատերը երկար ժամանակ պահված են եղել թանգարանի ֆոնդերում և նախկինում երբեք չեն ցուցադրվել։
«Քանի որ մոտենում էր կանանց միամսյակը, որոշեցինք այս գեղեցիկ առիթով բացահայտել կնոջ գաղտնիքներից մեկը։
Ցուցահանդեսի բացառիկությունը կայանում է նրանում, որ նման բովանդակությամբ ցուցադրություն առաջին անգամ է անցկացվում․ այս թեմային Հայաստանում դեռևս ոչ ոք չէր անդրադարձել»,- ասաց Մարինա Խաչմանուկյանը։
Ցուցասրահը բաժանված էր մի քանի հատվածների, որոնցից յուրաքանչյուրում համապատասխան կահույքի, լուսանկարների, հագուստի և աքսեսուարների հիասքանչ համադրության միջոցով հաջողվել էր փոխանցել ժամանակի շունչը։
Ցուցահանդեսի կենտրոնական նմուշը երևանյան հարսանեկան զգեստն էր, որը կարված էր մետաղաթելով։
Ցուցահանդեսի կարևոր մաս էին կազմում նաև արխիվային լուսանկարները։
«Եթե ուշադիր նայեք ընտանեկան լուսանկարներին, կնկատեք, որ ավագ սերնդի ներկայացուցիչները տարազ են կրում, իսկ երիտասարդները՝ եվրոպական հագուստ․ սա նշանակում է, որ Երևանում 19-ից 20-րդ դարում նորաձևությունը շատ բազմազան է եղել․ փողոցներում կարելի էր տեսնել թե՛ ազգային հագուստ, թե՛ եվրոպական։ Ընդ որում՝ ազգային հագուստը նույնպես միատեսակ չէր, քանի որ Երևան մշտական բնակության էին գալիս ընտանիքներ Արևելյան Հայաստանի տարբեր շրջաններից, գյուղերից, Արևմտյան Հայաստանից․ այս ընտանիքներն իրենց հետ բերում էին ոչ միայն իրենց սովորույթները, այլ նաև իրենց տարազատեսակները։
Քանի որ ապահովված ընտանիքների երիտասարդ աղջիկները կրթություն էին ստանում ոչ միայն Ցարական Ռուսաստանում, այլ նաև Եվրոպայում, վերադառնալով Հայաստան՝ վերջիններս շարունակում էին եվրոպական հագուստ կրել։ Այս հետաքրքիր համադրությունն էլ կարող եք տեսնել ցուցադրության մեջ»,- ներկայացրեց Մարինա Խաչմանուկյանը։
Ցուցահանդեսի շրջանակում ներկայացված էին նաև հայտարարությունների թերթեր, որտեղ առկա են մի շարք ուշագրավ հայտարարություններ, որոնք տեղեկատվություն են տալիս ժամանակի երևանյան նորաձևության մասին։
Հաշվի առնելով ցուցահադեսի հանդեպ մեծ հետաքրքրությունը՝ «Կնոջ զգստապահարանի գաղտնիքը» հանրության առջև բաց կլինի նախատեսվածից ավելի երկար՝ այսպիսով ավելի մեծ թվով մարդկանց հնարավորություն ընձեռելով ծանոթանալ նախորդ դարերում ապրած հայ կնոջ էսթետիկայի ընկալումների, նուրբ ճաշակի և հայկական մշակութային ժառանգության վկայությունը հանդիսացող բացառիկ նմուշների հետ։
