Նորաձևության ամիսը և Հայաստանը
Նորաձևության ամիսն արդեն ավարտվել է, սակայն հայ դիզայներները դեռևս շարունակում են մասնակցել ցուցադրությունների՝ այս անգամ՝ տարածաշրջանի երկրների մայրաքաղաքներում։
Նախքան անդրադառնալը սպասվելիք իրադարձություններին, խոսենք նորաձևության ամսվանը հայ դիզայներների ներգրավվածության մասին։
Փետրվարի 27-ից մարտի 2-ն ընկած ժամանակահատվածում տասը հայկական բրենդ մասնակցություն ունեցավ Միլանի նորաձևության շաբաթվա շրջանակում կազմակերպված «White Show Milano» նորաձևության ցուցահանդեսին, որի ընթացքում հայ դիզայներները հնարավորություն ունեցան իրենց արտադրանքը ներկայացնել գնորդների, միջազգային մամուլի և ոլորտի առաջատարների ուշադրությանը։
Մասնակից բրենդերի շարքում էին Nikolyan, Z.G.est, Boyakhchyan, Moment of White բրենդերը և այլն։ Նորաձևության հեղինակավոր ցուցահանդեսին հայ դիզայներների մասնակցությունը կազմակերպել էր Նորաձևության և հագուստի պալատը։
Միլանի նորաձևության շաբաթվա շրջանակում UHI բրենդը «Emerging Talents Milan» հարթակում ներկայացրեց իր նոր՝ «Rennaissance» և «EYECONIC» հավաքածուները։
«Rennaissance» հավաքածուի ոգեշնչումը, ինչպես կարելի է կռահել անվանումից, Վերածննդի դարաշրջանն էր։
Փետրվարի 9-ին Փարիզում՝ Ժամանակակից արվեստի Տոկիոյի պալատում, տեղի ունեցավ նորաստեղծ HAYELI բրենդի նոր հավաքածուի ցուցադրությունը․ հավաքածուում մեկտեղվել էին փարիզաբնակ հայ դիզայներ Արմինե Օհանյանի նորարարական ոճը և Նյու Յորքում ապրող հայ նկարիչ Տիգրան Ձիթողձյանի յուրօրինակ արվեստը։
Ձիթողձյանը հանդես էր գալիս որպես նախագծի համասեփականատեր և art տնօրեն։
Արմինե Օհանյանը երկար տարիներ ապրում է Փարիզում․ ստեղծագործում է տեխնո-կուտյուր ոճում՝ Ֆրանսիայում և աշխարհի՝ նորաձևության տարբեր հարթակներում ներկայացնելով սեփական՝ Armine Ohanyan Paris բրենդը։
HAYELI բրենդը ներկայացնում է Yooto հարթակը, որի հիմնադիրը «Նորք գրուպ» ընկերությունն է։
Հայ դիզայներ, The Muse բրենդի հիմնադիր Մանե Խաչատրյանը, մասնակցություն ունեցավ Փարիզի նորաձևության շաբաթին՝ ներկայացնելով իր՝ «աշուն-ձմեռ 25» հավաքածուն։
The Muse-ը հիմնադրվել է Հայաստանում մոտ տասը տարի առաջ։ Բրենդի նմուշները ներկայացված են աշխարհի մի շարք երկրների մուլտիբրենդային խանութներում։
Անցյալ տարի բրենդը՝ իր հավաքածուով մասնակցություն ունեցավ Միլանի նորաձևության շաբաթին։
Նորաձևության ամսվա անցուդարձից զերծ չմնացին նաև հայ մոդելները։ «Paris Fashion Days»-ի շրջանակում հայ մոդել Մարիա Ղարիբյանը մասնակեց Արաբական Միացյալ Էմիրություններում և Լիբանանում գործունեություն իրականացնող «Gio Dress» բրենդի ցուցադրությանը, որին անդրադարձել են այնպիսի հեղինակավոր ամսագրեր, ինչպիսիք են Harper’s Bazaar-ը։
Մարիան սիրիահայ է․ Հայաստան է տեղափոխվել շուրջ ինը տարի առաջ և արդեն հինգ տարի է զբաղվում է մոդելինգով։ Մոդելային կարիերան սկսել է «Atex» նորաձևության կենտրոնում, մասնակցել մի շարք միջազգային գեղեցկության մրցույթների, նորաձևության ցուցադրությունների և նկարահանումների։
Եվս մեկ հայ մոդել՝ Ռոզա Կիրակոսյանը վերջերս մասնակցել է Լոնդոնի նորաձևության շաբաթին՝ ներկայացնելով մի քանի միջազգային բրենդ։
Եվրոպական մայրաքաղաքներում անցկացվող նորաձևության միջոցառումներին զուգահեռ՝ հայկական բրենդերը մասնակցում են նաև տարածաշրջանում անցկացնող նորաձևության շաբաթներին։
Օրեր առաջ հայկական Loom Weaving Brand-ը՝ իր՝ Urban Boho հավաքածուով ներկայացավ Մոսկվայի նորաձևության շաբաթին, իսկ դիզայներ Մանուկ Ալեքսանյանն այս օրերին պատրաստվում է Ղազախստանի մայրաքաղաքում անցկացվելիք Visa Fashion Week-ին։
