Ինչ սպասել Երևանի նորաձևության շաբաթ 2025-ին
Երևանի նորաձևության շաբաթը վերադառնում է՝ կրկին մեկ տանիքի ներքո միավորելու հայ և արտերկրյա դիզայներներին, ոլորտի առաջատար մասնագետներին և նորաձևության սիրահարներին։
Երևանի նորաձևության շաբաթ 2025-ը հագեցած է լինելու մի շարք տպավորիչ միջոցառումներով՝ ցուցադրություններով, ցուցահանդեսներով, դիզայներական մրցույթներով, պանելային քննարկումներով։
Նորաձևության՝ տարվա գլխավոր միջոցառմանը մասնակցություն կցուցաբերի ավելի քան 20 դիզայներ՝ Հայաստանից և արտերկրից (Արաբական Միացյալ Էմիրություններ, Իրան, Ղազախստան, Ուզբեկստան, Մոլդովա, Ռուսաստան)։
Նորաձևության շաբաթվա միջոցառումները կլուսաբանվեն նորաձևության տեղական և միջազգային հեղինակավոր ամսագրերի կողմից (Vogue, Elle, Harper's Bazaar, BBC, Le Mile, Fucking Young, White Milano, Tranoi և այլն):
«Երևանի նորաձևութան շաբաթ 2025»-ն այս տարի նախատեսում է ունենալ չորս հագեցած օր (հոկտեմբերի 23-ից 26-ը), որոնց ընթացքում հայաստանաբնակ և արտերկրից ժամանած դիզայներները կցուցադրեն իրենց ստեղծագործությունները, սկսնակ դիզայներներն իրենց հավաքածուներով կներկայացնեն նոր գաղափարներ և տեսլական, կբացահայտվեն նոր անուններ, իսկ նորաձևութան սիրահարները հնարավորություն կունենան սուզվել նորաձևության և գեղեցիկի աշխարհ՝ ծանոթանալով ոլորտի ժամանակակից միտումներին ու զարգացումներին։
Նորաձևության շաբաթվա մեկնարկային օրը տեղի կունենա սկսնակ դիզայներների համար նախատեսված՝ Fashion Scout Armenia 2025 մրցույթը, որի հաղթողները հնարավորություն կունենան իրենց հավաքածուներով հանդես գալ Լոնդոնի նորաձևության շաբաթին, անվճար ուսանել Polimoda հեղինակավոր համալսարանում և ստանալ մի շարք տպավորիչ մրցանակներ։
Նորաձևության շաբաթվա շրջանակում նախատեսված միջոցառումների շարքում է հայ դիզայներների մասնակցությամբ կազմակերպված ցուցահանդեսը՝ Հայաստանի ազգային պատկերասրահում, որտեղ կցուցադրվեն նմուշներ՝ ոգեշնչված հայ նկարիչների ստեղծագործություններից։
Yerevan Fashion Week-ի շրջանակում պլանավորված են նաև հատուկ նախագծեր, որոնց նախապատրաստական փուլերն սկսվել են ամիսներ առաջ։ Այս միջոցառումների շարքում են CRELAB Տավուշ և CRELAB Կոտայք մարզային կենտրոնների կողմից ստեղծված հավաքածուների ցուցադրությունը և ցուցահանդեսը, «Denim Cycle» նախագծի շրջանակում ստեղծված հավաքածուի, ինչպես նաև «Pepsi x YFW» մրցույթի հաղթող նախագծի նմուշների ցուցադրությունը։
Ցուցահանդեսային տարածքն ավելի քան 60 բրենդի հնարավորություն կտա ներկայացնել սեփական արտադրանքը, իրականացնել վաճառք և ստեղծել նոր կապեր։
Նորաձևության շաբաթվա շրջանակում պլանավորված են նաև պանելային քննարկումներ և դասախոսություններ՝ նորաձևության ամենաարդիական թեմաներով՝ ոլորտի պրոֆեսիոնալների, միջազգային հյուրերի մասնակցությամբ։
Երևանի նորաձևության շաբաթն իրականացվում է 2023 թվականից ի վեր՝ նպատակ ունենալով զարգացնել հայկական նորաձևությունը, այն ճանաչելի դարձնել համաշխարհային հարթակներում և Երևանը հետզհետե վերածել նորաձևության շաբաթ հյուրընկալող քաղաքի։
Նորաձևության և հագուստի պալատը հիմնադրվել է 2017 թվականին՝ իր առջև ունենալով հայկական նորաձևությունը զարգացնելու տեսլականը։ Պալատին անդամակցում է ավելի քան 200 դիզայներ, բրենդների, և արտադրությունների հիմնադիրներ և ոլորտի այլ ներկայացուցիչներ:
Կառույցի հիմնական նպատակն է զարգացնել ոլորտի ներկայացուցիչների մասնագիտական և բիզնես կարողությունները և բարձրացնել հայկական արտադրանքի մրցունակությունը՝ միջազգային, նորարարական մոտեցումների կիրառմամբ, և հայկական նորաձևությունը լավագույնս ներկայացնել տեղական և համաշխարհային շուկաներում:
