Chanel-ի պատմության նոր դարաշրջանի սկիզբը կամ Մեթյու Բլեյզիի հաղթական դեբյուտը
Chanel-ի` «գարուն-ամառ 26» հավաքածուի ցուցադրությանը սպասում էր ողջ նորաձության աշխարհը. չէ՞ որ այն բրենդի նոր կրեատիվ տնօրեն Մեթյու Բլեյզիի` Chanel-ում առաջին հավաքածուն էր լինելու:
Սպասելիքները մեծ էին. նորաձևության աշխարհը թարմություն, նոր, ժամանակակից մոտեցումներ էր ակնկալում:
Սպասելիքներն արդարացան ավելիով. նոր հավաքածուի մասին գովասանքի խոսքերն ամենուր են. Բլեյզիի նոր հավաքածուն դուր է եկել նույնիսկ նորաձևության ամենաանխնա քննադատներին:
Ո՞րն էր հավաքածուի հաջողության գաղտնիքը:
Բլեյզին պահպանել էր Chanel-ի ԴՆԹ-ն և ոճը` միևնույն ժամանակ այն ներկայացնելով ժամանակակից շնչով և նոր մոտեցումներով:
Այո´, նոր հավաքածուն հենց Chanel-ի մասին էր. այն անդրադարձ էր նորաձևության տան պատմությանը, ժառանգությանը, ավանդույթներին, Կոկո Շանելի կյանքին. այս անդրադարձը, սակայն, արված էր ճիշտ ու գրագետ, գեղեցիկ, նոր կերպով ու շնչով։
Chanel-ը ժամանակի հետ, նույնիսկ՝ դրանից առաջ քայլելու մասին է. այս փաստը ժամանակին ապացուցել է լեգենդար Կոկոն՝ իր հավաքածուներում. այս ամենը ցույց տվեց նաև Բլեյզին:
Chanel-ի նոր հավաքածուում շեշտադրումը լոգոն չէր, (հակառակը` բրենդի լոգոյի փոքր տարբերակները հագուստի վրա գտնելը շատ դժվար էր) այլ զգացողությունն ու էմոցիաները, որոնք փոխանցվում էին հավաքածուի յուրաքանչյուր լուքի միջոցով:
Բրենդի ավանդական թվիդը որոշ նմուշներում նոր մեկնաբանություն ուներ. այն ստեղծված էր ուլունքներից: Հավաքածուում տեղ էին գտել նաև Շանելի սիրելի մետաքսն ու ջերսին։
Ոսկե հասկի տեսքով աքսեսուարները և ասեղնագործությունը անդրադարձ էր Կոկո Շանելի կյանքին. ոսկե հասկը Կոկոյի թալիսմանն է եղել և Ֆրանսիայում բարեկեցության խորհրդանիշ է համարվում:
Հավաքածուի կարևոր մաս էին կազմում նաև աքսեսուարները` մասնավորապես` պայուսակները: Մոլորակի տեսք ունեցող մինի պայուսակն արդեն բոլորի սիրելին է դարձել:
Հատուկ ուշադրության էր արժանի հավաքածուի վերջին նմուշը. ծավալուն, խայտաբղետ կիսաշրջազգեստը ստեղծվել էր սագի փետուրներից, օրգանզայից և ծաղկի թերթիկներից, այնուհետև՝ ներկվել․ շքեղ ասեղնագործության համար պահանջվել էր շուրջ 1700 ժամ:
Իր նոր հավաքածուով Մեթյու Բլեյզին նոր էջ բացեց Chanel նորաձևության տան պատմության գրքում՝ միևնույն ժամանակ ճանապարհ հարթելով բրենդի հետագա զարգացման և ապագայի համար:
