«Երևանի նորաձևության շաբաթ 2024»-ը մեկնարկեց խորհրդանշական վայրում
«Երևանի նորաձևության շաբաթ 2024»-ի բացման արարողությունը խորհրդանշական առիթ հանդիսացավ` հանրության ուշադրությունը սևեռելու խորհրդային ճարտարապետության խոսուն վկա՝ Բռնադատվածների հուշահամալիրին, որը նվիրված է 1920-ից 1991 թվականների ընթացքում հանիրավի բռնադատված, գնդակահարված ու աքսորված հազարավոր հայորդիների հիշատակին։
Նոյեմբերի յոթի երեկոյան հուշահամալիրի տարածքում անսովոր աշխուժություն էր տիրում․ չէ՞ որ այստեղ պետք է տեղի ունենար երկրի նորաձևության ամենամասշտաբային միջոցառման բացման արարողությունը։
Երեկոյի մթնշաղը, հուշահամալիրին հատուկ առեղծվածայնությունը և միջոցառման կարմիր լույսերը վիզուալ յուրօրինակ պատկերներ էին ստեղծել՝ է՛լ ավելի տպավորիչ դարձնելով պատմական հուշահամալիրի էմոցիոնալ ազեցությունը։
Միջոցառման բացումն ազդարարեց նորաձևության շաբաթվա կազմակերպիչ՝ «Նորաձևության և հագուստի պալատի» նախագահ Վահան խաչատրյանը, այնուհետև ողջույնի իրենց խոսքով հանդես եկան միջոցառմանն աջակցող կառույցների ղեկավարները (միջոցառմանն այս տարի աջակցություն են ցուցաբերել Երևանի քաղաքապետարանը, Բրիտանական դեսպանատունը և Բրիտանական խորհուրդը, Գերմանական միջազգային համագործակցության ընկերությունը և այլն):
Միջոցառման մեկնարկը տրվեց իտալաբնակ դիզայներ Նաիրա Խաչատրյանի՝ «Body Alchemy» հավաքածուի ցուցադրությամբ, այնուհետև շարունակվեց «Fashion Scout Armenia 2024» նորաձևության հեղինակավոր մրցույթի մասնակից դիզայներների հավաքածուների ցուցադրությամբ։
Fashion Scout-ը սկսնակ դիզայներների աջակցությանը և նորաձևության զարգացմանը միտված միջազգային հարթակ է, որի «հայրենիքը» Միացյալ Թագավորությունն է։
Նպատակը նոր տաղանդների բացահայտումն է և նորաձևության աշխարհում նրանց գործունեության համար մեկնարկային և առաջխաղացման հնարավորությունների ստեղծումը։
Մասնակից սկսնակ դիզայներները ներկայացրել էին նորարարական, բարձրորակ նյութերից ստեղծված և տեխիկապես ճիշտ կառուցված, կայուն նորաձևության նորմերին համապատասխանող հավաքածուներ։
Նախագծի հաղթող Սոնա Հովսեփյանը 21 տարեկան է։ Ավարտել է Հայաստանի գեղարվեստի պետական ակադեմիան՝ ստանալով հագուստի մոդելավորողի որակավորում։ 2023 թվականի սկզբին «Erasmus+» փոխանակման ծրագրով մեկնել է Իսպանիայի Կաստելո դե լա Պլանա քաղաք, որտեղ մեկ կիսամյակ սովորել է «Escola d’Art i Superior de Disseny de Castelló» դպրոցում։
Ամսագրի հետ զրույցում Սոնան նշեց, որ մրցույթում մասնակցությունը և հաղթանակը անչափ հաճելի փորձառություն է եղել, սակայն մրցույթի նախապատրաստական շրջանն այնքան լարված է եղել, որ նույնիսկ ժամանակ չի ունեցել մտածելու հաղթանակի մասին։
«Երբ բեմի ետևում լսեցի անունս,հանկարծակիի եկա, ու երբ գիտակցեցի, որ պետք է դուրս գամ բեմ ու բոլորն ինձ են նայում, հետաքրքիր զգացողություններ ունեցա․ սա շատ էմոցիոնալ պահ էր ինձ համար։
Ինձ համար ամենաուրախալի հանգամանքն այն է, որ ընկերուհիս՝ Եվան, նույնպես հաղթել է այս մրցույթում, և Լոնդոն պետք է մեկնենք միասին։ Սա, կարծում եմ՝ շատ տպավորիչ փորձառություն է լինելու։
Ներկայացված հավաքածուի ոգեշնչումը կապված է ուսանողական փոխանակման ծրագրով Իսպանիա կատարած այցիս հետ։ Այն փորձառությունը, որ ունեցել եմ, էմոցիոնալ առումով մեծ տպավորություն է թողել ինձ վրա, և այդ ամենն արտահայտել եմ ֆակտուրաների ձևերի միջոցով»,- նշեց Սոնան։
Միջոցառմանը ներկա էր և ժյուրիի կազմը նախագահում էր «Fashion Scout» հարթակի հիմնադիր Մարտին Ռոբերտսը։
Մարտինը նշեց, որ այս տարի՝ նախորդ տարվա համեմատ, մրցույթի դիմորդների թիվը կրկնակի է եղել, (մոտավորապես 60 հայտ) ինչն ուրախալի փաստ է․ սա նշանակում է, որ մրցույթն ավելի մեծ ճանաչում և հեղինակություն է ձեռք բերում։
«Կարծում եմ՝ այս տարվա մրցույթի բոլոր հաղթող մասնակիցները վստահաբար կարող են հետաքրքրել միջազգային շուկային․ նրանք հետաքրքիր գործվածքներ և տեխնիկաներ են օգտագործում, նրանք ազգայինը նորաձևության մեջ այնքան ճիշտ են ներկայացնում։ Կարծում եմ՝ ապագայում նրանք իրենց խոսքն ասելու են։
Վերը նշված հավաքածուներից զատ՝ իրենց ստեղծագործություններով հանդես եկան նաև Նորաձևության և հագուստի պալատի կողմից հիմնադրված երկու կենտրոնների՝ «CreLab Kotayk»-ի և «CreLab Tavush»-ի սաները։
Հատուկ ուշադրության էին արժանի Արցախի նորաձևության բուհերի ուսանողների՝ Արցախի ճարտարապետությանը նվիրված հավաքածուի ցուցադրությունը։
Լուսանկարները՝ Անուշ Մկրտչյանի։
