5 ռետրո ֆիլմ՝ ամանորի երեկոները ջերմացնելու համար
Ամանորն ընտանիքի և ընկերների հետ հին և բարի ֆիլմերը հիշելու և տոնական երեկոն դրանցով է՛լ ավելի ջերմացնելու ժամանակաշրջանն է։
Քանի որ համացանցում շատ են նոր ֆիլմերով կազմված ցանկերը, որոշեցինք վերհիշել հոլլիվուդյան հին և բարի ամանորյա ֆիլմերը և առաջարկել ռետրո ֆիլմերի մեր հնգյակը։
Եվ այսպես, ի՞նչ ֆիլմեր դիտել ամանորին․
Կյանքը հիասքանչ է (It's a wonderful life, Эта замечательная жизнь)
Արտադրման տարեթիվ՝ 1946 թվական
Արտադրող երկիր՝ ԱՄՆ
Ժանր՝ ֆենթզի, դրամա, ընտանեկան
Ֆիլմի հերոսը՝ Ջոն Բեյլին, շարունակական անհաջողություններից հիասթափված, որոշում է ինքնասպանություն գործել։ Աստված, տեսնելով հույսը կորցրած տղամարդուն, երկիր է ուղարկում նրա պահապան հրեշտակին, որպեսզի վերջինիս օգնությամբ Բեյլին հասկանա, թե իր կյանքը որքան կարևոր է և թե ինչպես է այն օգնել իր շրջապատի մարդկանց՝ իր կյանքի տարբեր փուլերում։
Սիրավեպ ամանորին (Holiday Affair, Праздничный роман)
Արտադրման տարեթիվ՝ 1949 թվական
Արտադրող երկիր՝ ԱՄՆ
Ժանր՝ մելոդրամա, կատակերգություն
Ֆիլմը կոմերցիոն լրտես Կոննի Էննիսի և հանրախանութի աշխատակից Սթիվի՝ ամանորի նախօրեին սկսված սիրավեպի մասին է։ Հանրախանութի գնային քաղաքականության մասին գործատուին տեղեկատվություն փոխանցելու համար Կոննին թանկարժեք խաղալիք է գնում, այնուհետև՝ արժեքը պարզելուց հետո, վերադարձնում։ Սթիվը մերկացնում է կնոջ սուտը, սակայն հաշվի առնելով նրա՝ միայնակ մոր կարգավիճակը, բաց է թողնում և արդյունքում՝ կորցնում իր աշխատանքը։ Աշխատանքի կորստին զուգընթաց՝ Սթիվը նորը ձեռքբերում ունի․ նա հանդիպել է Կոննիին։
Սուրբ ծնունդը Կաննեկտիկուտում (Christmas in Connecticut, Рождество в Коннектикуте)
Արտադրման տարեթիվ՝ 1945 թվական
Արտադրող երկիր՝ ԱՄՆ
Ժանր՝ մելոդրամա, կատակերգություն
Էլիզաբեթ Լեյնը ԱՄՆ-ում բաղադրատոմսերի ամենահայտնի հեղինակներից է։ Իր հոդվածներում նա իրեն ներկայացնում է՝ որպես հիասքանչ խոհարար, հմուտ ֆերմեր և ընտանիքի հոգատար մայր։ Այս ամենը, սակայն, սուտ է։ Իրականում նա ապրում է Նյու Յորքում, չունի ընտանիք և ի վիճակի չէ նույնիսկ ձու եփել։ Թե ինչպես է բացահայտվում նրա սուտը, կիմանաք ֆիլմը դիտելիս։
Բնակարան (The apartment, Квартира)
Արտադրման տարեթիվ՝ 1960 թվական
Արտադրող երկիր՝ ԱՄՆ
Ժանր՝ տրագիկոմեդիա
Բաքստերն աշխատում է ապահովագրական ընկերությունում։ Գործընկերներին հաճոյանալու և կարիերայում որևէ կերպ աճ գրանցելու համար վերջինս իր բնակարանի բանալիները տալիս է ոչ միայն գործընկերներին, այլ նաև՝ ղեկավարին։ Երբ ամեն ինչ հետզհետե սկսում է կարգավորվել, տեղի է ունենում անսպասելին։
Հիշիր գիշերը (Remember the night, Запомни ночь)
Արտադրման տարեթիվ՝ 1940 թվական
Արտադրող երկիր՝ ԱՄՆ
Ժանր՝ դրամա, մելոդրամա, կատակերգություն
Լի Լիանդերը ձերբակալվել է՝ զարդերի խանութի կողոպուտի համար։ Նրա գործով զբաղվում է երիտասարդ քննիչ Ջոն Սարջենտը։ Վերջինս դատարանին խնդրում է Սուրբ ծնունդի տոնակատարություններով պայմանավորված՝ հետաձգել դատական լսումները և կնոջը խղճալով՝ նրան հրավիրում է ամանորը նշել իր ընտանիքի հետ։
